El Padre Rhomberg había sido Vicario General de la Compañía de Jesús en Roma hasta la supresión de la orden. En esta carta escrita en latín le agradece a La Beata su labor en la continuación evangélica de los jesuitas en América.
Domina in Christo Veneranda.
P.C. Deus Opt. Max. pro infinita bonitate sua largissime remuneretur singularem illam propensionem, ac benevolentiam Vestram erga afflictam Matrem nostram Societatem, eiusque infelices Filios per orbem dispersos, pro quibus, ut intelleximus, misericordiam Domini etiam per intercessionem Sanctorum Nostrorum, ac praecipue S. Josephi, implorare non desinitis, quorumque memoriam, ac bonum odorem in illis partibus aut conservare aut reparare verbo, et opere incessanter satagitis. Omnes quidem huic tantae benignitati vestrae obstricti sumus, sed ego cum primis, quem velut omnium indignissimum, officiosissimis Litteris honorare, mihique vestram illum in societatem nostram tam properum affectum, studiumque testari, amantissime voluistis. Debeo propterea, habeoque grates, quas possum, maximas et devinctissimas, Deumque rogo, ut hanc vestram adeo in his benevolam voluntatem ratam, gratamque habere, eiusque sancta desideria, ac vota ad Ssmi Nominis sui maiorem gloriam confirmare, atque adimplere clementissime dignetur.
Hoc ipsum scio, precantur mecum, et totis animis quidem, Fratres mei in Dño carissimi, nec ii solum, qui hîc mecum Romae, aut alibi per Italiam ex omni Natione quam plurimi, degunt, sed etiam qui in Francia, Germania, Anglia, Polonia, ac Russia, qui et in Asia apud Sinas sunt; nam ad hos omnes tum per me, tum per alios e Nostris iam dudum pervenit notitia sanctae consolationis plena, quam de eximia vestra erga societatem nostram affectione, ac praecipue de ardentissimo illo zelo vestro, per Sacra Sancti Patris Nostri Exercitia Divinam Gloriam, animarumque salutem promovendi, zelique huius amplissimis, ac vere prodigis… ex vestris, hanc ex aliorum Litteris accepimus.
Non possum satis explicare, quantum inde in Domino recreati, atque aedificati sint omnes, quamque ex cordis intimo laudaverint, ac benedixerint Misericordias Dñi, tanta, ac tam mirabilia in illis partibus per Sacra Exercitia operantis. Peculiariter vero, et praecipuo quodam modo gavisus inde, atque in Laudem Divinissimae Bonitatis, ac Providentiae effusus est felix ille manipulus societatis in Alba Russia divinitus adhuc conservatus. Is, partim ut sanctam, quam ex dictarum verum narratione conceperat, consolationem suam, laetitiamque palam faceret, partim ut tantis vestris in nos meritis gratitudinem aliquam demonstraret, communicationem, fructumque bonorum operum, ac me vitarum suarum offerre vobis, et conferre decrevit, huiusque voluntatis suae instrumentum, ab ipsomet adm. Rev. P. Vicario Gen. propria manu subscriptum, nuperis diebus ad me misit, petens, ut ad manus vestras promoverem. Eum in finem consignavi illud Rev.do P. Gaspar Juarez, qui pro singulari sua erga me comitate, ac benevolentia promisit curationem se, ut ad vos in Americam rite perveniat. Ambo confidimus, pium hoc, et sincerum reciproci affectus, ac tot titulis debitae gratitudinis testimonium neutiquam ingratum fore.
Caeterum dum ad augmentum Divinae Gloriae, sanctaeque Religionis emolumentum, Deo iuvante, ac benedicente tam multa, magnaque operamini in America, recordamini, obsecro, etiam Europae nostrae, quaeque in ea est, Catholicae Ecclesiae, infelici hoc saeculo, tam graviter infestatae et a propriis Filiis plurimum afflictae. Alias iam scripserit de hoc aliquid, quem paulo ante nominavi, Rev.dus P. Gaspar a me tunc rogatus. Id modo repeto, et, per quidquid possum, rogo, atque obtestor, ut Divinam Clementiam, ac Misericordiam etiam pro his regionibus tum per Vestras, tum per aliorum, quotquot poteritis, ardentes preces, piaque opera implorare non desistatis. Vicissim et nos non cessabimus, Divinissimae Bonitati supplicare, ut ferventi zelo, sanctisque conatibus vestris benedictionem uberrimam, ac copiosissimam, prout hactenus tam liberaliter, tamque mirabiliter praestitit; deinceps quoque clementissime impartiri dignetur, mundumque omnem per vos, aliosque adiutores vestros ad agnitionem eiusdem infinitae Bonitatis suae perducere, atque eius amore omnium corda inflammare. Fiat. Fiat! Ita ardentissime cupio, ac precor. Vester.
Romae, 30 Iunii 1786. Domina in Christo Veneranda.
Suus infimus in Christo. Ignatius Rhomberg olim Assistens Germaniae.
Ficha técnica.
- Fecha: 30 de junio de 1786.
- Desde Roma
- De Padre Ignacio Rhomberg
- a Mama Antula.
- Idioma: Latín.
Cf. ASR 164-166 (en latín).
Familia Mama Antula 